Mark 11

Yesu wutambulu mu nkembo ku Yelusalemi

(Matayi 21.1-11 ; Luka 19.28-40 ; Yowani 12.12-19)

1Mu thangu bafikama ku Yelusalemi, buna beka nduka tula ku Betifange ayi ku Betani ku ndambu mongo minti mi Olive ; Yesu wutuma minlonguki miandi miodi ayi 2wuba kamba :

—Yendanu ku buala bobo buidi ku ntualꞌeno, beno tula, buna ma lumona muana phunda wukangama, kadi mutu kawudiatidi ko. Lunianguna wawu ayi lutuala wawu. 3Vayi enati mutu wuluyuvudi : “Bila mbi lumvangila bobo e ?”, buna lunkamba : “Pfumu mfunu kawuvuidi”. Buna wela kuwufila nsualu vava.

4Bayenda, bamona muana phunda beni buna wukangimini va ndambu muelo, ku nganda, mu yenda nzila. Bawu nianguna.

5Batu bankaka baba vana bayuvula :

—A mbi biobi lumvana e ? A mu diambu di mbi luniangunina muana phunda wowo e ?

6Bavutula banga boso Yesu kabatumina. Batu beni bababika benda kuawu.

7Banata muana phunda beni kuidi Yesu ; bayala minledi miawu vambata muana phunda beni, ayi, Yesu wuvuanda va mbata muana phunda beni. 8Batu bawombo bayala minledi miawu mu nzila, bankaka bayala matafi maminti momo bazenga mu zitsola.

9Batu bobo baba ku ntuala ayi bobo baba ku mbusa baba yamikinanga :

Ozana !
Bika kasakumunu mutu wowo wunkuizila
mu dizina di Pfumu !
10 Bika kisakumunu Kipfumu kioki kinkuiza,
kipfumu ki nkuluꞌeto Davidi
Ozana mu bibuangu binzangama.
11Yesu bu kakota ku Yelusalemi, wuyenda mu Nzo Nzambi. Bu kazungisa thalu andi mu bima bioso, wuyenda ku Betani va kimosi ayi kumi minlonguki miandi miodi mu diambu di thangu yeka kielo.

Yesu wusinga nti wu figi

(Matayi 21.18-19)

12Mu lumbu kilanda, bu batotuka mu Betani, Yesu wumona nzala. 13Buna wukidi thama, wumona nti wumosi wu figi wuba meza mamboti. Wufikama mu tala kani lenda mona muna makundi. Vayi bu kafikama vaba nti, meza na meza kaka kamona, bila yisia ba tsungi yi makundi ma figi ko.

14Buna Yesu wukamba nti wu figi :

—Kadi mutu kalendi buela dia dikundi di nti aku ko.

Minlonguki miandi miwa bu katuba mambu momo.

Yesu mu Nzo Nzambi

(Matayi 21.12-17 ; Luka 19.45-48 ; Yowani 2.13-16)

15Buna bayetula ku Yelusalemi, Yesu wukota ku luphangu lu Nzo Nzambi, ayi wukuka batu bobo baba sumbisa bima ayi bobo baba sumba bimamuna luphangu lu Nzo Nzambi. Wusengubula zimeza zi batu bobo baba sienzanga zimbongo ayi bikundu bi bobo baba sumbisanga mabembi. 16Ayi wukandika ti kadi mutu wumosi kabika buela viokisila mimfuna mu Nzo Nzambi.

17Buna wutona longa ti :

—Tala Disia sonama ko ti bela tedilanga nzo ama Nzo yi lusambulu mu diambu di batu boso e ? Vayi beno lukitudi yawu nsuku wu mivi.

18Bapfumu zi zinganga Nzambi ayi minlongi mi Mina bu bawamambu momo kavanga, batomba nzila yi kumvondila. Bila boma baba kummonamu diambu di nkangu wu batu boso simina wuba simina mu diambu di malongi mandi.

19Bu batula va masika, Yesu ayi minlonguki miandi batotuka mu divula.

Lulendo lu minu

(Matayi 21.20-22)

20Mu nsuka wu lumbu kilanda bu baba viokila vana, bamona nti wufigi wumeni yuma nate muna mianzi. 21Piela wutebuka moyo mu mambu mavioka, wukamba Yesu :

—A Nlongi ! Tala nti wu figi wowo wusingidi wuyumini !

22Yesu wuvutula :

—Bika minu kieno kiba mu Nzambi. 23Bukiedika ndikulukamba, enati mutu kembi kuidi mongo wawu : “botuka vava, wukilozi mu mbu” ayi enati kakadi memeta mu ntimꞌandivayi wilukidi ti mambu momo kakembi mafueti kaka vangama, buna diambu beni difueti kaka vangama. 24Diawu ndikulukambila ti dioso kuandi diambu di lunlomba mu lusambulu, luwilukila ti lutambudi diawu, ayi, luela mona ti divangimini.

25Vayi mu thangu lutidi sambila enati mutu beki ndiandi diambu, bikakanlemvukila muingi dise dieno didi ku Diyilu niandi mamvandi kalulemvukila mu zinzimbala zieno. [ 26Vayi enati lumengi lemvukila, buna dise dieno didi ku Diyilu kalendi kululemvukila ko mu zinzimbala zieno ▼

▼Buku kiaki kisi ko mu minkanda minkaka mi khulu.

.]

Balenza kipfumu ki Yesu

(Matayi 21.23-27 ; Luka 20.1-8)

27Bosi batula diaka ku Yelusalemi. Yesu bu kaba ndiengila mu luphangu lu nzo Nzambi, bapfumu zi zinganga Nzambi, minsoniki ayi bakulutu ba batu bayiza kuidi niandi. 28Banyuvula :

—Mu lulendo mbi wulembo vangila mambu momo e ? Ayi nani wuveni lulendo beni e ?

29Yesu wuba vutudila :

—Thidi ku luyuvula kiuvu kimosi ; enati lupheni mvutu, buna bosi minu mamvama ndieka kulukamba mu lulendo lu nani ndilembo vangilanga mambu momo. 30Nani wuvana Yowani minsua mu botika, Nzambi voti batu e ? Luphana mvutu.

31Bayindula, bawu na bawu ayi bakamba :

—Enati tukembi ti “Nzambi” buna maka tuyuvula : “Vayi buna bila mbi lukambu kunwilukila e ?” 32Vayi enati tuvutudi ti “Batu”…

Batu baba mona boma bilabatu boso bawilukila ti Yowani wuba mbikudi wukiedika.

33Buna bavutudila Yesu ti :

—Tuisi zaba ko. Yesu mamvandi wuba vutudila :

—Minu mamvama ndilendi kulukamba ko kani mu lulendo lu nani ndilembo vangila mambu mama.